मंगलवार, आषाढ ९, २०८३ , पोखरा
पर्यटकीय राजधानी पोखरा मा पछिल्ला दिनहरूमा भारतीय पर्यटकको उल्लेख्य वृद्धि भएसँगै यहाँका होटल तथा आवास सेवा प्रदायकहरू भरिभराउ भएका छन्। विशेषगरी लेकसाइड क्षेत्र, धार्मिक स्थल तथा प्रमुख पर्यटकीय गन्तव्यहरूमा पर्यटकको चहलपहल उल्लेखनीय रूपमा बढेको देखिएको छ।
फेवाताल परिसर र तालबाराही मन्दिर आसपास भारतीय पर्यटकको घुइँचो लागिरहेको छ। साथै विन्ध्यवासिनी मन्दिर, मुक्तिनाथ मन्दिर लगायतका धार्मिक गन्तव्यहरूमा पनि पर्यटकको उपस्थिति उत्साहजनक रहेको पर्यटन क्षेत्रसँग सम्बन्धित तथ्यांकहरूले देखाउँछन्।
हालको गर्मी मौसममा भारतका विभिन्न स्थानबाट चिसो हावापानी र प्राकृतिक सौन्दर्यको खोजीमा पोखरा आउने पर्यटकको संख्या बढ्दो क्रममा रहेको छ। यससँगै डुङ्गा सयर, छोटो दूरीका पदयात्रा, प्याराग्लाइडिङ, ¥याफ्टिङ तथा अन्य साहसिक गतिविधिमा समेत उल्लेखनीय वृद्धि भएको छ।
फेवातालमा दैनिक हजारौं पर्यटकले डुङ्गा सयर गर्ने गरेका छन्। बाराही घाट क्षेत्रबाट मात्रै सयौँ डुङ्गा नियमित सञ्चालनमा रहेका छन्, जसले स्थानीय पर्यटन व्यवसायलाई थप चलायमान बनाएको छ।
पछिल्लो करिब डेढ महिनाको अवधिमा मात्र ठूलो संख्यामा भारतीय पर्यटक पोखरा भित्रिएको अनुमान गरिएको छ। यस अवधिमा होटलहरूको अकुपेन्सी दर उल्लेखनीय रूपमा बढेर करिब ९० प्रतिशतसम्म पुगेको पर्यटन व्यवसायीहरू बताउँछन्। पाँचतारे होटलदेखि साना होटल तथा धर्मशालासम्म पर्यटकको उपस्थिति उच्च रहेको देखिएको छ।
पर्यटकहरू विशेषगरी धार्मिक भ्रमण, छोटो पदयात्रा तथा साहसिक खेलकुद गतिविधिमा सहभागी हुने गरेका छन्। साथै, पोखराको प्राकृतिक दृश्यावलोकन र सांस्कृतिक अनुभव लिनेतर्फ उनीहरूको आकर्षण बढ्दो छ।
परम्परागत रूपमा ‘अफसिजन’ मानिने यस समयमा समेत पर्यटक आगमन बढ्नुले स्थानीय पर्यटन उद्योगमा सकारात्मक प्रभाव पारेको छ। पर्यटन व्यवसायीहरूका अनुसार यस्तो प्रवृत्ति आगामी दिनमा समेत कायम रहने अपेक्षा गरिएको छ।
