१७ बैशाख २०८३, पोखरा,
मानवसेवा आश्रम कास्की हेमजा शाखाको मुल भवनलाई पूर्णता दिन तथा सेवा विस्तारको लागि श्रीमद्भागवत् सप्ताह, पितृउद्वार ज्ञानविज्ञान महायज्ञ २०८३ गर्न लागिएको छ । लक्ष्मीनारायण मन्दिर तथा मुक्तिनाथ सेवा धर्मशाला निर्माण सम्पन्न गर्न, आश्रमको अक्षयकोष वृद्धि गरी दीगो सेवा सुनिश्चित गर्ने उद्देश्यले यही वैशाख १९ देखि २६ गतेसम्म महायज्ञ गर्न लागिएको हो । २०६९ भदौ १३ गते मकवानपुरको हेटौंडाबाट सेवा सुरु गरेको आश्रमले २३ जिल्लामा ३४ वटा सेवा केन्द्र सञ्चालन गरेको छ । राष्ट्रव्यापी रुपमा सेवा आश्रम चलाएर २ हजार १ सयभन्दा बढी सहयोगापेक्षी व्यक्तिलाई संरक्षण दिएको आश्रमको पोखरा सेवा केन्द्रबाट ३ सय आश्रितलाई सेवा प्रदान गरिएको छ ।
आश्रमका संस्थापक अध्यक्ष तथा परिकल्पनाकार रामजी अधिकारीले पोखरा – २५ हेमजाको बाबियातरामा लक्ष्मीनारायण सनातन संस्कार प्रतिष्ठानको ६३ रोपनी क्षेत्रफलको मुल भवन निर्माण सक्नका लागि महापुराण गर्न लागको जानकारी दिए । मुल भवन निर्माणका लागि करिब ८ करोड रुपैयाँ खर्च भइसकेको जानकारी दिँदै उनले गुरु योजना अनुसार भवनलाई पूर्णता दिन थप ४ करोड लाग्ने बताए । लक्ष्मी नारायण मन्दिर निर्माणका लागि करिब ३ करोड खर्च भएको उल्लेख गर्दै उनले मन्दिरका लागि थप २ करोड आवश्यक पर्ने जनाए ।
उनले अर्थ संकलनलाई मात्र केन्द्रीत नभएर महायज्ञ मानवता प्रबर्द्दनलाई ध्यान दिने बताए । उनले महायज्ञमा मानवता, परोपकारी असल चरित्र, दया करुणालाई केन्द्रविन्दुमा राख्ने उल्लेख गरे । ‘महायज्ञबाट संकलित रकममार्फत कास्की शाखाको निर्माणाधीन भवन २०८३ असोज मसान्तभित्र पूर्णता दिएर करिब ३ सय सहयोगापेक्षी नागरिकलाई गृह प्रवेश गराउने योजना छ,’ उनले भने, आश्रमका लागि कुनै प्रकारको विपत्ति, भवितव्य वा कठिन परिस्थितिमा प्रयोग गर्न मिल्ने गरी कम्तीमा १० करोड बराबरको अक्षयकोष स्थापना गर्नु आवश्यक छ ।
उनले हेमजा र छोरेपाटनमा अहिले ३ सय जना आश्रितको व्यवस्थापनको लागि मासिक ४० लाख रुपैयाँ खर्च लाग्ने जनाए । देशव्यापी रुपमा अहिलेसम्म १३ वडा महायज्ञ लगाएको जानकारी दिँदै उनले अब १४ औ पटक महायज्ञ गर्न लागेको बताए । उनले पण्डित कमलनयन गौतमले सुरुवातदेखि गुरु दक्षिणा नलिएर कथावाचन गरेको उल्लेख गरे । परोपकारी तथा मानवीय संस्था आश्रमले सन २०८३ सम्ममा सहयोगापेक्षी सडक आश्रित मानव मुक्त नेपाल निर्माणको संकल्प अगाडि सारेको बताए ।
महायज्ञ मुल आयोजक समितिका संयोजक अनिलकुमार शाहीले महायज्ञलाई सफल बनाउन सबै क्षेत्रको साथ सहयोग रहेको जनाए । अक्षयकोष सुदृढ गर्दै दीर्घकालीन सेवा व्यवस्थापन गर्ने जानकारी दिदै उनले निर्माणाधीन लक्ष्मीनारायण मन्दिरको निर्माण सम्पन्न गरी प्राण प्रतिष्ठा गरी नियमित पूजा सञ्चालन गर्ने उल्लेख गरे । महायज्ञको उद्घाटन समारोह अगाडि बाजागाजा, सांस्कृतिक झाँकीसहितको शोभा कलश यात्रा निकालिने कार्यक्रम छ ।
वैशाख २० देखि २६ गतेसम्म दैनिक योग विज्ञान शिविर, विद्यार्थी लक्षित प्रेरणात्मक कार्यक्रम, सत्संग, भजन चुड्का प्रतियोगिता, भागवत कथा वाचन सञ्चालन हुने सहसंयोजक धर्मराज बास्तोलाले बताए । महायज्ञ अवधिभर भजन–कीर्तन, सांगीतिक प्रस्तुति, धार्मिक अनुष्ठान तथा विभिन्न क्षेत्रका विशिष्ट व्यक्तित्वहरूको सहभागिता रहने सहसंयोजन सुष्मा पौडेलले जानकारी दिइन् ।
सन २०८३ सम्ममा देशभरीका सडकका वेवारिसे व्यक्तिहरुको व्यवस्थापन गर्ने योजना अगाडि सारेका आश्रमले परिवारबाट तिरस्कृत भएर सडकमा वेवारिसे भएका व्यक्तिहरु उपचार र पुनस्थापनको लागि ध्यान दिएको छ । सडकमा वेवारिसे व्यक्ति रहन नदिने परिकल्पनालाई गण्डकी प्रदेश सरकारको साथ पाएको आश्रमले सडक पेटीमा जीवन यापन गर्दै आएका अनाथ, अपांग र मानसिक समस्याका विरामीहरुलाई उद्धार, उपचार, पालनपोषण र परिवारमा पुनर्मिलन सेवा गर्दै आएको छ ।
