श्रावण १७ ,पोखरा
निर्माणाधीन तालचोक–बेगनास सडक विस्तारमा देखिएका समस्याका बारेमा स्थानीय सरोकारवालासँग छलफल गरिएको छ ।
पोखरा महानगर प्रमुख धनराज आचार्यको सहभागितामा भएको छलफलमा सडक निर्माणका क्रममा देखिएका समस्या र विवाद एक साताभित्र समाधान गर्ने समझदारी भएको छ ।
हाल उक्त सडकका चार स्थानमा समस्या देखिएको छ । शिशुवाचोक नजिकै ६० मिटर लम्बाइमा राइट अफ वे, शिशुवा चोकस्थित राइट अफवे भित्र रहेको पुरानो घर विस्थापन गर्नु पर्ने, देउराली खोलामा बन्ने पुलको उचाइ र त्रिकाङचोकदेखि तल सेन्टर लाइन र राइट अफ वेको समस्या रहेको पाइएको छ ।
यी समस्याको समाधानमा लागि आवश्यक समन्वयका लागि नगर प्रमुख आचार्य, दलका नेताद्वय दिवसमान प्रधानाङ्ग र राधिकाकुमारी शाही योगी, महानगका प्रवक्ता मोतीलाल तिम्सिना, पोखरा–२७ का वडाध्यक्ष पूर्णकुमार गुरुङ, पोखरा–३० का वडाध्यक्ष दुर्गा सुवेदी र पोखरा–३१ का वडाध्यक्ष ढकनाथ कँडेल, योजनाका फोकल पर्सन इ.नवीन गौतमलगायत रहने गरी विवाद समाधान समिति गठन गरिएको छ ।
समितिले विवादको समाधान गरी निर्माण कार्यमा आवश्यक सहजीकरण गर्नेछ । नगर प्रमुख आचार्यले महानगरको गौरवको आयोजनाको रूपमा रहेको उक्त आयोजनाको म्याद अब धेरै नरहेकाले समयमा नै सम्पन्न गर्नुपर्ने बाध्यता रहेको बताए ।
विश्व बैँकको सहयोगमा निर्माण भइरहेको आयोजना निर्माणमा विलम्ब हुँदा त्यस क्षेत्रका नागरिकले सास्ती खेप्नु परेको उनले बताए ।
आयोजनाका कारण स्थानीय उपभोक्तालाई परेको समस्यामाथि खुला छलफल गर्न महानगरपालिका तयार रहेको बताउँदै उनले अल्पकालीन भन्दा पनि यसको दीर्घकालीन फाइदाका बारेमा सोच्न आग्रह गरे ।
