२१ भाद्र, टोकियो (जापान संवाददाता)
साहित्यकार तीर्थ श्रेष्ठको एकल कविता वाचन कार्यक्रम जापानको टोकियोमा भव्यतापूर्वक सम्पन्न भएको छ ।
अन्तर्राष्ट्रिय नेपाली साहित्य समाज (अनेसास) जापान च्याप्टर र कास्की–पोखरा समाज जापानको संयुक्त आयोजनामा सम्पन्न कार्यक्रममा श्रेष्ठले आमा, हिउँमा लेखिएको नाम, लाहुरेको चिठी, लयमा लगायतका दर्जनौँ लोकप्रिय कविता वाचन गर्नुभएको थियो।
श्रेष्ठका हिउँमा लेखिएका नामहरू, जिन्दगीको कुरुक्षेत्र, महाभारतमा गीतहरू मुक्तक संग्रह तथा मेरै हिमालजस्तो गीत संग्रह नेपाली साहित्यमा विशेष योगदान मानिन्छ ।
कार्यक्रममा नेपालका लागि जापान स्थित राजदूत दुर्गा बहादुर सुवेदी, एनआरएनए आईसिसी उपाध्यक्ष रोविन शेरचन, एनआरएनए जापानका पूर्व अध्यक्ष शिवप्रसाद पौडेल र अनेसासका निवर्तमान अध्यक्ष प्रकाश पौडेल ‘माइला’लगायत अतिथिहरूले मन्तव्य व्यक्त गर्दै श्रेष्ठका सिर्जनाले नेपाली साहित्यलाई दिएको योगदानको प्रशंसा गरेका थिए ।
कार्यक्रम अनेसास जापान च्याप्टरका अध्यक्ष अरुण पौडेलको अध्यक्षता, उपाध्यक्ष दीपा घिमिरेको स्वागत मन्तव्य तथा महासचिव अनिल कुमार ‘निर्दोष’को सञ्चालनमा सफलतापूर्वक सम्पन्न भएको हो ।
