३ भाद्र, पोखरा।
पोखरा फोटोग्राफर संघ नेपालले १८६औं विश्व फोटोग्राफी दिवस पोखरामा विविध कार्यक्रमसहित भव्यरुपमा सम्पन्न गरेको छ । दिवसको सुरुवात कुंडहर आधारभूत विद्यालयमा अध्ययनरत दृष्टिबिहीन बालबालिकालाई सहयोग हस्तान्तरण गर्दै गरिएको थियो । विशेषगरी हरितालिका तीज पर्वको समेत अवसर पारेर संघको महिला उपसमितिले यो वर्षको कार्यक्रम दृष्टिबिहीन बालबालिकाको हितमा समर्पित गरेको महिला उपसमित संयोजक मिरु लम्सालले केन्द्रिय आवाजलाई बताउनु भयो ।
सहयोग हस्तान्तरणपछि मानवअधिकार चोकबाट सुरु भएको प्रभातफेरी चिप्लेढुंगा हुँदै संघको कार्यालयमा पुगेर शुभकामना आदानप्रदानसहित सम्पन्न भएको थियो ।
कार्यक्रमका प्रमुख अतिथि तथा पोखरा फोटोग्राफर संघका संस्थापक सदस्य धनबहादुर सुब्बाले २०३९ सालतिर करिब १५–२० वटा स्टुडियोका फोटोग्राफरहरू भेला भई संघ स्थापना गरेको स्मरण गर्नुभयो। हालसम्म संघले उल्लेखनीय फड्को मार्दै प्रगति गरेको देख्दा आफू अत्यन्त खुसी भएको उहाँको भनाइ थियो।
नेपाल फोटोग्राफर महासंघका उपाध्यक्ष तथा पोखरा फोटोग्राफर संघका पूर्व अध्यक्ष दुर्गा प्रसाद पौडेलले नेपालमा फोटोग्राफीको इतिहासबारे चर्चा गर्नुभयो। कैलाश बचत तथा ऋण सहकारी संस्थाका उपाध्यक्ष विनोद ढकालले पोखरा फोटोग्राफर संघ र कैलाश सहकारीबीचको सम्बन्धलाई ‘नङ र मासु’को जस्तै अविभाज्य सम्बन्ध भएको टिप्पणी गर्नुभयो।
त्यस्तै, फोटोग्राफर संघ गण्डकीका वरिष्ठ उपाध्यक्ष तथा पोखरा फोटोग्राफर संघका पूर्व अध्यक्ष तुलसीराम सुवेदीले संघलाई देशकै अग्रणी संस्था बनाउन खेलेको भूमिकाको प्रशंसा गर्नुभयो।
कार्यक्रममा संस्थाका संरक्षक गणेश छवि, निवर्तमान अध्यक्ष रामचन्द्र पोखरेल, पूर्व अध्यक्षहरू बलराम शर्मा, रविनाथ दाहाल, नारायण बाटाजु, महिला उपसमितिकी पूर्व संयोजक इन्दिरा शर्मा, तिर्थ श्रेष्ठलगायतले शुभकामना मन्तव्य राख्नु भएको थियो ।
पोखरा फोटोग्राफर संघका अध्यक्ष भक्तबहादुर तामाङको अध्यक्षतामा सम्पन्न कार्यक्रममा स्वागत मन्तव्य उपाध्यक्ष नन्दकला पौडेलले गर्नुभएको थियो भने सञ्चालन सचिव लक्ष्मीपति पौडेलले गर्नुभएको थियो।
