२९ श्रावण, पोखरा
पोखरा महानगरपालिका र गणतन्त्र कोरियाको युङजिन विश्वविद्यालयबीच प्राविधिक शिक्षामा छात्रवृत्ति तथा शैक्षिक आदानप्रदानका लागि समझदारी पत्रमा हस्ताक्षर गरिएको छ।
पारस्परिक लाभ, समानता, पारदर्शिता र साझा विकासको सिद्धान्तमा आधारित उक्त समझदारीमा पोखरा महानगरपालिकाका प्रमुख धनराज आचार्य र युङजिन विश्वविद्यालयका प्रोफेसर चोइ जेइयोङले हस्ताक्षर गरे।
समझदारी अनुसार, प्राज्ञिक, सांस्कृतिक र प्राविधिक सहयोगमार्फत पोखरा महानगरको अन्तर्राष्ट्रिय प्रतिस्पर्धात्मक क्षमता अभिवृद्धि गरिनेछ। साथै शिक्षा, पर्यटन र प्रविधिको क्षेत्रमा अन्तर्राष्ट्रिय सहकार्यलाई सुदृढ बनाउन मानव संसाधन तथा सूचना आदानप्रदान, अनुकूल शैक्षिक कार्यक्रम सञ्चालन, भ्रमण आदानप्रदान तथा भर्चुअल शिक्षामा साझेदारी गरिनेछ। सहरी विकास, पर्यटन र दिगो अभ्यासजस्ता क्षेत्रमा संयुक्त अनुसन्धान तथा नवप्रवर्तन परियोजनामा पनि दुवै पक्षले सहकार्य गर्नेछन्।
नगर प्रमुख आचार्यका अनुसार, यस समझदारीले पोखराबाट कोरिया अध्ययनका लागि जाने विद्यार्थीलाई अध्ययन, सामाजिक सुरक्षा तथा न्यूनतम रोजगारीका अवसरमा विश्वविद्यालयले सहजीकरण गर्नेछ। यसले अन्तर्राष्ट्रिय छात्रवृत्तिमा पहुँच विस्तार गर्दै उच्चशिक्षा अध्ययनमा रुचि राख्ने विद्यार्थीलाई महत्वपूर्ण सहयोग पु¥याउने उनले बताए।
प्रोफेसर चोइ जेइयोङले प्राविधिक शिक्षा, मानव संसाधन विकास र पारस्परिक लाभका विषयमा पोखरा महानगरसँग घनिष्ठ सहकार्य गर्न विश्वविद्यालय तत्पर रहेको बताए। उनका अनुसार, यसले दुई देशबीचको शैक्षिक सम्बन्धलाई अझ सबल बनाउनेछ।
यसअघि पनि कोरियन सरकार तथा विभिन्न एजेन्सीहरूको सहयोगमा पोखरामा थुप्रै परियोजनाहरू सञ्चालनमा रहेका छन्।
